გავწმენდ წარსულის ნათაროებს,  თან დროს გავატან,
ფანჯარას გული გავუშალე - ცამდე აიტანს!
სევდას მტვერიანს ამოვიჭრი, სულს გადავაბამ,
ბოლო დაკუჭულ სიტყვას ვუწვდი, ურნა ატირდა.

ზღვის სიფართეში ჩაშვებული დადნა ნაყინი
და შენს თეთრ მხრებზე ანგელოზად დაუთოვია,
გავყურებ ტალღებს, დაღლა მამჩნევს, კედლებს დავითვლი,
მე უკვე მივხვდი მარტოობა ვისი ტოლია!

სიტყვა ყურს გაჭრის, ყური ბადებს გულთან რეზონანსს
და დიაფრაგმა ქოლგასავით ჩაკეცვადია,
ვინც ეს ფიქრები მეორეჯერ გაამეორა...
ვინც გამიცილა მოთმინებით მუქი სტადია...

თუ სიტყვა არის ჟონგლიორის ბურთთა მუქარა -
დავემუქრები ყველა ტკივილს მე გადაწევით!
თუ დაიკარგე - შენმა ფრთებმა დამიუარა,
თეთრო ფურცლებო ჯიბეებში თქვენ გადარჩებით!

ზღვის სიფართეში ჩაშვებული გალღვა ნაყინი
და შენს თეთრ მხრებზე ანგელოზად დაუთოვია,
გავყურებ კედლებს, დაღლა მამჩნევს, ტალღებს დავითვლი,
მე უკვე მივხვდი მარტოობა შენი ტოლია!

საქართველო დღეს ისედაც ერთი დიდი ჰესია.
დროა ყველა დამიწება ჯართეულით შევფაროთ,
შეგვეწიეთ! ჩვენ არა გვყავს ენდემური მესია...
საქართველო დღეს ცრემლებით შელესილი "გესია".

მშიერ ობლებს დავეხმაროთ - ზურაბებად შევბანტოთ,
დღეს მჩაგვრელო გაიხარე, კაპიტალი შენია.
დაგვაგუბეს, შეგვაერთეს - ნათურებს მივებაროთ,
საომარი იყო... ახლა ორზღვაშუა "გესია".

როგორც დედა გაბმით საწოლს
ისე არხევს ვაგონს რწმენა,
თუნდაც ჭერი გადახადონ,
თუნდ მოუხდეს გადაფრენა.

არსად წავა... ჯიუტია?!
არა! მხოლოდ ეძებს მგზავრებს,
კომენდანტის საათამდე,
მენდეთ, სახლში გაგამგზავრებთ.

მაგრამ ერთი რაც არ მომწონს
და ვაკელი ქება ლექსში,
შენს სახლამდე მომავალი
გაუთავდათ მუშებს რელსი...