Sa paanong paraan, saang wika?
Alam mo ba na ang pangalan mo na
ang bagong panata at adhika?
Sa paanong pagsaysay kaya?
Wari mo ba na ako lang ang
makapagbibigay sa'yo ng saya?
Sa anong sukat ng pangungusap?
Alam mo ba na ikaw ang aking araw
sa likod ng madidilim na ulap?
Sa anong haba kaya ng talinhaga?
Batid mo bang ako lang ang
makapagbibilang ng iyong halaga?
Paano kita maikukubli sa tula?
Paano kung panay lang ang hula?
Ako lamang dapat ang tanging
makapagsusulat ng iyong alamat.
Ako lamang dapat ang hanging
dadampi at hahalik sa iyong balat.